Polizia eta Larrialdietako Euskal Akademiak adimen artifizialak polizia-lanean duen eragina aztertu du

• Segurtasunaren arloko ia 200 profesionalek entzun dituzte teknologia berri horien aplikazioari buruz adituek egindako gogoetak.

Jon Goikolea Polizia eta Larrialdietako Euskal Akademiaren zuzendari nagusia buru dela inauguratu da gaur goizean “PAREZ PARE: Adimen Artifiziala eta polizia-eremuan duen aplikazioa” jardunaldia, Eusko Jaurlaritzak eta Euskal Herriko Unibertsitateak antolatuta. Topaketan segurtasunaren arloko 190 profesional elkartu dira, besteak beste, Ertzaintzako agenteak, udaltzainak eta teknikariak.

Bi mahai-ingurutan, hainbat unibertsitate-zentrotako adituek aztertu dute teknologia berri hori nola eraldatzen ari den delitu-arriskuaren prebentzioa, ikerketa eta kudeaketa polizia-lanean. Gonbidatu diren hizlariek honako gai hauek jorratu dituzte:

• “Seme-alaben eta gurasoen arteko indarkeriaren arriskua baloratzean adimen artifiziala aplikatzeko aukerak”, Ismael Loinaz (EHU).
• “EBn errekonozimendu biometrikoari aplikatutako adimen artifiziala”, Silvia Badiola (Nafarroako Unibertsitate Publikoa).
• “Terrorismoaren finantzaketa: Erronkak eta soluzioak sistema adimendunak erabiliz”, Javier Valls Prieto (Granadako Unibertsitatea).
• “Adimen artifiziala eta delituaren ikerketa: ezkutuko agente informatikoa child grooming-ekin lotutako delituetan”, Iñaki Riaño (Nafarroako Unibertsitate Publikoa).
• “Adimen artifizial prediktiboa delituaren prebentzioaren eta ikerketaren eta prozesu penalaren zerbitzura” María Luisa García Torres (Alfonso X.a Jakituna Unibertsitatea).

LANKIDETZA

Jardunaldi hauek Eusko Jaurlaritzak eta EHUk izenpetutako hitzarmenaren esparruan egiten dira. Hitzarmen horren helburua da Polizia eta Larrialdietako Euskal Akademiak eta Kriminologiako Euskal Institutuak (IVAC-KREI) elkarlanean jardutea kriminologiaren eta biktimologiaren arloan formakuntza emateko eta ezagutza aztertu eta hedatzeko, bai eta segurtasun publikoarekin erlazionatutako jarduera akademikoak egiteko ere.