Kontsumobidek modu arrazionalean kontsumitzea aholkatzen du Black Friday honetan

Turismo, Merkataritza eta Kontsumo Sailak, Kontsumobideren bitartez, Black Friday kanpaina aurkeztu du gaur, Euskadiko kontsumitzaileak kontzientziatzeko deskontu komertzialak modu arrazional eta arduratsuan aprobetxatzeko hartu behar dituzten neurriez.

«Erostean, ez saldu zure burua» lelopean, kanpainaren helburua da erosketaren benetako beharrari buruz hausnartzea, eta edozein produktu erosi aurretik prezioak alderatzea. Kontsumobidek gogorarazten du egun hauetan ugaritu egiten direla sustapen oldarkorrak eta denboran mugatutako eskaintzak. Kasu hauetan, erosketa inpultsiboak egiteko arriskua areagotzen da.

Gauzak horrela, Kontsumobidek aholku argia helarazi nahi du; «Black Friday-a merkeago erosteko aukera ona izan daiteke, baina baita arduragabekerian erortzen den une bat ere. Horregatik, kontsumitu bai, baina modu arrazionalean».

Kanpaina telebistan, irratian, prentsan, kanpoaldeko euskarrietan eta hedabide digitaletan zabalduko da, Black Friday egunaren aurreko astean. Epe horretan, Kontsumobidek aholku praktikoak emango ditu kontsumitzaileen bermeen, itzulketen eta eskubideen inguruan. Kontsumoko Euskal Institutuak gogorarazten du, edozein zalantza edo gorabeheraren aurrean, herritarrek kontsultak egin ditzaketela, bai aurrez aurre bere bulegoetan edota online www.kontsumobide.eus webgunean.

Ekintza horien bidez, Turismo, Merkataritza eta Kontsumo Sailak kontsumitzaileen eskubideak babesteko eta erosketa-ohitura arduratsu eta iraunkorrak sustatzeko konpromisoa berresten du.