Ander Caballerok Arku Atlantikoko Batzordearen Osoko Bilkuran du eta Itsas Eskualde Periferikoen Konferentziaren 53. Batzar Nagusian parte hartu

Kanpo Harremanetarako eta Euskadi Globaleko Idazkari Nagusia den Ander Caballerok Bartzelonan izan den Arku Atlantikoko Batzordearen Osoko Bilkuran eta Itsas Eskualde Periferikoen Konferentziaren (CRPM) 53. Batzar Nagusian parte hartu du Bartzelonan. Caballerorekin batera, Mikel Anton Europako Gaietarako zuzendaria eta Marta Marin Euskadik EBn duen ordezkaria izan dira.

Arku Atlantikoko Batzordea (CAA), CRPMko sei Batzorde Geografikoetako bat, Imanol Pradales lehendakaria da buru. Ander Caballero izan da Osoko Bilkuraren buru. Bilera horretan CAA osatzen duten lurralde atlantikoetako ordezkari politikoak izan dira, fatxada atlantikoaren garapena sustatzeko interesa duten eragile sozio-ekonomikoekin batera; merkataritza-ganberak eta unibertsitateak, besteak beste.

Ander Caballerok Atlantikoko Makroeskualdea defendatu du, tresna egokia baita Arku Atlantikoa Europari lotuta mantentzeko eta bere interesak eta lehentasunak Europako agendaren erdigunean jartzeko. Ildo horretan, ekainean Sevillan egin zen Arku Atlantikoko Batzordearen Batzar Nagusian onartutako funtsezko bi dokumentu ekarri ditu gogora: Makroeskualde Atlantikoaren Ibilbide Orria eta Eremu Atlantikoaren Lurralde Garapenerako Adierazpen Bateratua, bost helburu estrategikoren inguruan eskualdeak, hiri atlantikoak, merkataritza-ganberak, unibertsitateak eta erakunde sozioekonomikoak batzen dituen aliantza estrategikoa. Osoko Bilkuran, proiektu enblematiko atlantikoekiko finantziazioa lerrokatzeko eta unibertsitateen foro atlantiko baten sorreran egindako aurrerapenak errepasatu dira.

Bestalde, CRPMren Batzar Nagusiak onartutako Adierazpen Politikoak Europako itsas eskualdeek eta eskualde periferikoek Batasunaren etorkizunaren eraketan duten zeregin estrategikoa azpimarratzen du. 2028-2034 Urte Anitzeko Finantza Esparrurako Europako Batzordearen proposamena – bereziki, elkartzeko nazio- eta eskualde-planei dagokienez – funtsean aldatu behar dela uste du, lurralde-kohesioa eta eskualde-garapena lehiakortasun-politiken erdigunean kokatzeko. Era berean, Europako Egitura eta Inbertsio Funtsak ‘megafondo’ berri batean batzeko ekimenari buruz ohartarazi du. Bestalde, Adierazpen Politiko hori onartuz, CRPMk berretsi egiten du makroeskualdeko estrategia eta ekimenak babesten dituela, eta Mediterraneoan eta Atlantikoan sortzen ari diren makroeskualde-estrategia berriak abiaraztearen alde egiten du. Itsas eskualdeetarako eta eskualde periferikoetarako EBren funtsezko politika eta gaiei buruzko iritzia ere ematen du, hala nola, Europako garraio-azpiegitura garatzeko estrategiei buruzkoa, EBko portuei buruzkoa, Ozeanoaren aldeko Itunari buruzkoa edo karbono-hustubide urdin eta berdeen babesari buruzkoa.

Eusko Jaurlaritzak Makroeskualde Atlantikoaren proiektua gauzatzeko lanean jarraitzen du, eta, ildo horretan, Europako Gaietarako zuzendariak eta Euskadik EBn duen ordezkariak bilera bat izan dute Charlina Vitchevarekin Itsas Gaiak eta Arrantza (DG MARE)-ko Zuzendaritza Nagusitik. Arro Atlantikoaren Estrategiari eta Atlantikoko Ekintza Planaren berrikuspenari buruz eztabaidatu dute, eskualdeek beren gobernantzan parte-hartze handiagoa izan dezaten.