Aro digitalak dituen arrisku berriei buruz ohartarazi du Torres Lehendakariordeak eta lan ingurune seguru eta osasungarriekiko “konpromiso irmoa” berretsi du

Ekonomia, Lan eta Enplegu sailburuak baliabideak, prestakuntza eta partehartzea indartu nahi ditu, arrisku teknologiko eta psikosozialei aurrea hartzeko, ezbehar tasa murrizteko eta laneko ongizatea hobetzeko

Mikel Torres Eusko Jaurlaritzako Lehendakariordeak eta Ekonomia, Lan eta Enplegu sailburuak gaur, asteazkena, azpimarratu du garrantzitsua dela eraldaketa digitalari “gizakia ardatz duen ikuspegi batetik” ekitea, ‘2023-2025 aro digitaleko lan seguru eta osasuntsuak’ Europako Goi bileraren amaierako ekitaldian. Bilera bihar amaituko da, eta Laneko Segurtasun eta Osasunerako Europako Agentziak sustatutako hiru urteko kanpainari amaiera emango dio.

Inaugurazio ekitaldian izandako hitzartzean, Lehendakariordeak eskerrak eman dizkio Europako Agentziari, “lanean egindako lanagatik, inplikazioagatik eta laneko segurtasunean egindako lanagatik eta eskainitako arduragatik, Eusko Jaurlaritzako Ekonomia, Lan eta Enplegu Sailak ere gure ahaleginei arreta jartzen diegun gai horretan”.

Mikel Torresek gogorarazi duenez, teknologia berriak “lan egiteko modua ari dira eraldatzen”, eta aldaketa horrek “lan inguruneak hobetzeko aukera garrantzitsuak irekitzen ditu”; hala nola, lanpostu seguruagoak diseinatzea, zeregin errepikakorrak automatizatzea edo arriskuen detekzio goiztiarra egitea AAren edo robotikaren bidez.

Hala ere, trantsizio horrekin batera datozen erronkak ere nabarmendu ditu; bereziki, eremu psikosozialekoak, “autonomia galtzearen pertzepzioa, gizarte isolamendua areagotzea eta lan bizitzaren eta bizitza pertsonalaren arteko mugak lausotzea ekar baitezakete”. “Beharrezkoa da kudeaketa algoritmoek izan ditzaketen arriskuak kontuan hartzea”, adierazi du, sor ditzaketen joera eta erabaki bidegabeez ohartaraziz.

Era berean, Torresek gogorarazi du faktore psikosozialak datozen urtetako lan arrisku garrantzitsuenen artean daudela Europako 27 herrialdeetako langile guztientzat, eta depresioa, estresa, antsietatea edo lo arazoak eragin ditzaketela, Laneko Segurtasun eta Osasunerako Europako Agentziak berriki egindako txosten batean adierazi bezala.

Haren hitzaldian, Ekonomia, Lan eta Enplegu Sailak eta Osalan – Laneko Segurtasun eta Osasunerako Euskal Erakundeak prebentzioarekin duten “erabateko konpromiso eta irmoa” adierazi du Torres Lehendakariordeak. “Ezin dugu onartu jornala irabazteko haren etxetik ateratzen den langile bat ezin itzuli ahal izatea etxekoengana. Lan istripu bakoitza hautsitako familia bat da, proiektu eten bat, galdu behar ez zen bizitza bat”.

“Horregatik, erabakitasunez lan egiten dugu baliabideak indartzeko, prebentzio ekintzaren kalitatea hobetzeko, prestakuntza bultzatzeko eta enpresei eta langileei ingurune seguruagoak eraikitzen laguntzeko. Izan ere, laneko ezbehar tasa ez da saihestezina, eta zero istripuko egoera baterantz aurrera egitea ez da asmo erretoriko bat, baizik eta erantzukizun kolektibo bat, uste osoz eta inor atzean ez uzteko borondatearekin hartzen duguna”, baieztatu du.

Ekimen digitalak

Osalanen bitartez, eremu digitalarekin lotuta Ekonomia, Lan eta Enplegu Sailak bultzatu dituen ekimenak errepasatu ditu Torresek, besteak beste, Munduko Egunari edo Laneko Segurtasun eta Osasunaren Europako Asteari lotutako urteko kanpainak. Horien artean, «Digitalan» tresna eta «Deskonektatu konektatzeko» kanpaina nabarmendu ditu, deskonexio digitalerako eskubidean jartzen baitute arreta, baita prebentzio kultura erronka teknologikoetara egokitzeko ekimen berria ere.

Osalan.app web aplikazioa martxan jartzea ere jarri du balioan, Laneko Segurtasuna eta Osasuna herritarrengana zuzenean, modu erabilerrazean eta garai berrietara egokituta hurbiltzen duena.

Torres Lehendakariordeak gogorarazi du digitalizazioa pertsonen ongizatera bideratu behar dela “beti”. “Teknologia ez da berez helburu bat, bitarteko bat baizik. Digitalizazioa prebentzio kultura sendo batekin integratzea lortzen badugu, enpresa lehiakorragoak ez ezik, gizarte bidezkoagoak, osasungarriagoak eta iraunkorragoak ere eraikiko ditugu”.