1.127 agentek osatutako polizia-dispositiboak zainduko du A21eko hauteskunde-eguneko segurtasuna

1.127 agentek osatutako polizia-dispositiboak zainduko du A21eko hauteskunde-eguneko segurtasuna

Ertzaintzako 939 agentek eta Euskadiko udaltzaingoetako 288 agentek zainduko dute hauteskunde-eguna ahalik eta normaltasunik handienaz joango dela
Ziberzaintza-dispositiboa arduratuko da mehatxuak detektatzeaz: sare sozialen bidez desinformazioa zabaltzea, identitatea ordeztea informazio sentsiblera baimenik gabe sartu ahal izateko edo hautagaien lekua hartzea

Josu Erkoreka lehenengo lehendakariorde eta Segurtasuneko sailburuak gaur goizean aurkeztu du bihar, igandea, egingo diren 2024ko Eusko Legebiltzarrerako Hauteskundeak direla eta, Eusko Jaurlaritzak prestatu duen segurtasun-dispositiboa. Dispositibo bikoitza da:

• Aurrez aurreko herritarren segurtasuna: 1.127 agentek osatuko dute hauteskunde-eguneko segurtasuna zainduko duen polizia-dispositiboa. Euskadiko 22 ertzain-etxeetako 939 agente eta Euskadiko 81 udaltzaingoetako 288 udaltzain izango dira. Horietako gehienek bozketa-zentroetara bertaratuta egingo dute hauteskunde-egunaren jarraipena, baina beste unitate espezializatu batzuetako, besteak beste, Ertzaintzaren Ikerketa Kriminalaren Unitateko edo Inteligentzia Bulego Nagusiko baliabide operatiboak ere izango dira.

• Zibersegurtasuna: ziberzaintza-dispositiboaren ardura halako prozesuetan ohikoenak diren mehatxuak detektatzea izango da, esate baterako, sare sozialen bidez desinformazioa zabaltzea, identitatea ordeztea informazio sentsiblera baimenik gabe sartzeko, hautagaien lekua hartzea, defacement deiturikoa, zerbitzua ukatzea, etab. Arreta beti izaten diren mehatxuetan, hau da, arrazoi ekonomikoa dutenetan edo era guztietako zibererasoetan ez ezik, profil hacktibista duten eta posizionamendu ideologikoa duten eragin-taldeek bultzatzen dituzten mehatxuetan ere jarriko da. Cyberzaintzak esparru horretako erreferentziako erakunde gisa jardungo du, hauteskundeetan zeregin aktiboa duten erakunde nagusien segurtasun digitala indartzeko, aipagarria den zerbait detektatzen denean ohartaraziz eta mehatxuaren eragina arintzeko behar den informazioa partekatuz.