Oion, atxilotu bat bi etxebizitzatan lapurtzeagatik

Ertzaintzak 34 urteko gizon bat atxilotu zuen atzo, osteguna, arratsaldean, Oiongo bi etxebizitzatan indarra erabiliz lapurtzea egotzita. Eraikinetara sartzeko leihoak manipulatu zituzten, eta beste bi pertsonak lapurreta horietan ustez parte hartu ote zuten ikertzen ari dira.

Atzo arratsaldeko zortziak baino lehentxeago, Guardiako ertzain-etxeko patruila batek ibilgailu bat geldiarazi zuen Oion herrian, eta barruan gizon bat zihoan. Antza denez, jasotako informazioaren arabera, udalerriko kale batetik kontrako noranzkoan ibili da, eta etxebizitzetako lapurretekin zerikusia izan dezake.

Ertzainek gidaria identifikatu zuten, eta egiaztatu zuten autoaren barruan mazo bat, bost eskularru pare eta atzo bertan Zaragozako saltoki batean egindako hainbat tresna erosteko tiketak zeramatzala. Dagozkion egiaztapenak egiten ari ziren bitartean, partikular bat patruilara hurbildu zen, inguruan bizi zela eta, bai berari eta bai bizilagunari, euren etxebizitzetan lapurtu egin zietela esateko.

Jarraian, agenteek egiaztatu zuten bi etxebizitzek behartuta zutela eraikinetako leihoetako bat, eta barrualdea nahasita zegoela.

Ebidentzia horiek ikusita, ibilgailuan atzemandako gizona atxilotu egin zuten, lapurreta horiekin zerikusia zuelakoan. Ertzaintzak zabalik du oraindik delitu horiei buruzko ikerketa, eta beste bi pertsonak gertakarietan parte hartu zutelakoan dago.

Atxilotua epaitegira eramango dute, dagozkion polizia-izapideak amaitu ondoren.