Gasteiz, oinezko bati tiraka lapurtzea egotzita atxilotu dute

22 urteko gazte bat atxilotu zuten atzo arratsaldean Gasteizen, emakume batek salatutako indarkeriazko lapurreta baten harira Ertzaintzak egindako ikerketa baten ondorioz. Egindako ikerketei esker, hiriko bi ostalaritza-establezimendutan atxilotuak aurreko orduetan egindako beste bi lapurretetan ere parte hartu duela jakin ahal izan da.

Uztailaren 11ko goizaldean, emakume batek Ertzaintzaren aurrean salatu zuen gazte batek eraso egin ziola gau hartan, Aranbizkarra auzoan zebilela. Gizonak bizkarretik eraso egin zion, lepoan zeraman kateari tiraka. Erabilitako indarkeriaren ondorioz, biktima erori egin zen, eta lurrean zegoela, poltsa eta beste bitxi batzuk kentzen saiatu zen. Antza denez, lekuko bat bertaratu zen salatzaileari laguntzera, eta lapurra ihesi joan zen.

Gertatutakoaren berri izan ondoren, ikerketa bat abiarazi zuten, eta, horren ondorioz, 22 urteko gazte bat lapurretaren ustezko egile gisa identifikatzea lortu zuten. Gazte horrek polizia-aurrekari ugari ditu, eta hainbat aldiz atxilotu dute azken hilabeteetan, jabetzaren aurkako hainbat delitutan parte hartzeagatik. Delitu horietako batzuetan indarkeria bortitza erabili du. Susmagarria atzo arratsaldean aurkitu zuten, eta berehala atxilotu eta ertzain-etxera eraman zuten.

Egindako ikerketen ondorioz, atzo goizaldean eta goizean hiriko bi ostalaritza-establezimendutan izandako beste bi lapurreten egilea nor den jakin dute, eta antzeko beste delitu-ekintza batzuetan parte hartu ote duten ikertzen ari dira.

Beharrezko eginbideak amaitu ondoren, atxilotua agintari judizialaren aurrean aurkeztuko da.