Imanol Pradales Lehendakaria euskal diasporara hurbilduko da Boiseko Jaialdian

• Lehendakariak agenda politiko eta kultural bat uztartuko du Estatu Batuetako euskal diaspora berriarekin harremana estutzeko
• Bidaiak indartu egiten du Eusko Jaurlaritzak kanpoko euskal komunitateekin eta Euskadiren proiekzio globalarekin duen konpromisoa

Imanol Pradales Lehendakaria, Ibone Bengoetxea lehen lehendakariorde eta Kultura eta Hizkuntza Politikako sailburuarekin, Ander Caballero Kanpo Harremanetarako eta Euskadi Globaleko idazkari nagusiarekin eta Ziortza Olano Kanpoko Euskal Komunitatearen zuzendariarekin batera, Estatu Batuetara joango da Boiseko Jaialdian parte hartzera. Jaialdi hori, hamarkada bateko absentziaren ondoren, berriro ospatuko da, Eusko Jaurlaritzaren parte-hartze instituzional nabarmenarekin ospatu ere. Boiseko 2025eko Jaialdia euskal topaketarik handiena da Euskaditik kanpo, eta Ipar Amerikako euskal diasporarekin harremanak sendotzeko aukera paregabea da. Testuinguru horretan, lehendakariaren bidaia ofizialak agenda politiko eta kultural bizia uztartuko du, Euskadiren nazioarteko errekonozimendu eta proiekzioaren aldeko apustu argi batean.

Eusko Jaurlaritzak bi helburu hauek ditu: batetik, Idaho estatuko eta Boise hiriko agintariekin harreman instituzionalak sendotzea, eta, bestetik, Estatu Batuetako euskal komunitatea errekonozitu eta babestea, euskal kulturaren eta balioen enbaxadore naturala izan baita hamarkada askotan. Hortaz, Jaialdira itzultzea aukera bat da diaspora berri horrekiko konpromisoa berritzeko, bere sustraiekiko lotura bizirik mantentzen baitu, eta, aldi berean, Euskadi Globalarekin lotzeko modu berriak bultzatzen ditu.

Lehendakariaren agenda uztailaren 29an, asteartea, hasiko da, Jaialdiaren batzorde antolatzaileak egingo dion harrerarekin, eta ekitaldi garrantzitsuz betetako aste bat abiatuko da horrela. Uztailaren 30ean, asteazkena, Imanol Pradalesek Basque Block bisitatuko du, Boiseko euskal-komunitatearentzako leku enblematikoa eta ondare kultural partekatuaren ikurra. Egun horretan bertan, BSU Gala for Basque Institutions ekitaldi instituzionalean parte hartuko du (Boise State Universityn antolatu da), euskal instituzioen eta diasporaren arteko lotura aktiboaren erakusgarri den ekitaldian.

Uztailaren 31n, osteguna, eduki politiko handiko jardunaldi bat egingo da. Jardunaldi horrek barne hartuko du topaketa ofizial bat Brad Little Idahoko gobernadorearekin, Estatuko Kapitolioan, eta bilera bat Lauren McLean Boiseko alkatearekin. Ikurrina altxatzeko ekitaldi sinboliko bat egingo da harekin, adiskidetasun- eta errekonozimendu-keinu gisa. Egunean zehar, lehendakariak ‘ZORTZIAK BAT’ mintegian parte hartuko du Boise State Universityn, Euskadiren eta Boiseren arteko kultura-, hezkuntza- eta gizarte-harremanen inguruan gogoeta egiteko gune izango den mintegian. Gauean, Sports Night eta Street Dance ekitaldi herrikoietan parte hartuko du, kultura eta komunitatea uztartzen dituen jaialdian.

Abuztuaren 1ean, ostirala, lehendakaria North American Basque Organization (NABO) erakundeko ordezkariekin bilduko da, Estatu Batuetako euskal elkarte-sare nagusiarekin harreman instituzionala sendotzeko. Gainera, nortasun kolektiboaren adierazpide gisa soka-dantza errekonozitzeko ekitaldi batean parte hartuko du, eta Eusko Jaurlaritzaren harrera ofizial batera joango da, diaspora berriari zuzenduta, askotariko komunitate dinamikoa eta konprometitua den diaspora berriari.

Lehendakariak 2025eko Jaialdian parte hartzeak aukera berri bat dakar Euskadi Globala sareko antenetara hurbiltzeko. Sare horrek euskal gizartearen eta horrek nazioartean duen proiekzioaren arteko loturak indartzen ditu munduaren luze-zabal osoan, gure mugetatik kanpo Euskadiren orainaren eta etorkizunaren parte aktibo izaten jarraitzen dutenekiko konpromiso instituzionala sendotuta.