SD Eibar-ek ongizate digitala sustatu du Udako Campusean, Emakunde eta 90 Grados-en laguntzarekin

SD Eibar Fundazioak antolatutako Udako Campusean, parte-hartzaileek hainbat jarduera egin dituzte ongizate digitala lantzeko helburuarekin, pantailen, sare sozialen eta gailu digitalen erabilera orekatu, kontziente eta segurua sustatzeko asmoz.

Ekintza hau klubaren Berdintasun Planaren baitan kokatzen da, eta Emakunde eta espezializatutako 90 Grados enpresaren lankidetzari esker gauzatu ahal izan da. Elkarrekin, adingabeen adinari egokitutako proposamen pedagogiko bat garatu dute.

Escape room hezitzaile baten gisako dinamiken bidez, ikasleek hainbat kontzeptu landu dituzte: mugikorra arduraz erabiltzea, interneteko arriskuak identifikatzea (ziberjazarpena, mendekotasun digitalak, iruzurrak, etab.), pribatutasunaren errespetua eta ingurune digitalean emozioak kudeatzeko gaitasuna.

Ekimenari amaiera emateko, SD Eibarrek Ongizate Digitalerako Dekalogoa helarazi die familiei, Emakunderen babesarekin egindako dokumentua. Gida hori euskaraz eta gaztelaniaz dago eskuragarri, eta haur eta nerabeen teknologia-erabilera etxetik laguntzeko hamar gomendio erraz eta praktiko eskaintzen ditu.

Ekintza honen bidez, SD Eibarrek gazteen heziketa integralarekin duen konpromisoa berresten du, arlo fisiko eta teknikoaz harago, hezkuntza- eta gizarte-eremuan ere lan eginez, eguneroko erronkak ikuspegi berdinzale eta prebentibo batetik jorratuz.