Osakidetzak aurreratu egin du gripearen aurkako txertoa herritar guztientzat, gaurtik aurrera eta aurretiko hitzordua hartuta Bizkaiko eta Gipuzkoako osasun-zentroetan

• Bizkaiko eta Gipuzkoako edozein pertsonak eska dezake hitzordua webgunearen bidez edo osasun-zentrora deituta
• Araban egungo planari eutsiko zaio, eta intzidentziaren bilakaeraren arabera egin daitezkeen doikuntzak baloratuko dira
• Bizkaia da gaur egun intzidentzia handiena duen lurraldea (118 kasu 100.000 biztanleko), ondoren Gipuzkoa (45,24) eta, azkenik, Araba (15,22). Euskadi osoan, 100.000 biztanleko 78,58koa da intzidentzia

Osakidetzak gripearen aurkako txertaketaren hasiera astebete aurreratzea erabaki du —Bizkaiko eta Gipuzkoako osasun-zentroetako herritar guztiek hitzordua eskatuta— bi lurralde historikoetan erregistratutako datu epidemiologikoak eta asistentzialak direla eta. Datu horien arabera, gripea aurten aurreratu da. Araban egungo planari eutsiko zaio, eta intzidentziaren bilakaeraren arabera egin daitezkeen doikuntzak baloratuko dira. Gaurtik aurrera, Bizkaiko eta Gipuzkoako herritar guztiek eska dezakete hitzordua Osakidetzaren webgunearen bidez edo osasun-zentrora deituta.

Osasun Sailak eta Osakidetzak herritarrak oro har eta arrisku-taldeak, bereziki haurrak eta gazteak, txertoa jartzera animatzen dituzte, “txertoa delako gaixotasun hori prebenitzeko edo, gutxienez, gripearen birusaz kutsatuz gero osasunean konplikazioak saihesteko tresnarik onena”.

Gripearen intzidentzia Euskadin

Bizkaia da gaur egun intzidentzia handiena duen lurraldea (118 kasu 100.000 biztanleko), ondoren Gipuzkoa (45,24) eta, azkenik, Araba (15,22). Euskadi osoan, 100.000 biztanleko 78,58koa da intzidentzia. Gripeak eragindako larrialdiak guztizkoaren % 0,88 dira; Santa Marina Ospitalea nabarmentzen da, % 3,53rekin. Ospitaleetako oheen batez besteko okupazioa % 75etik gorakoa da lurralde guztietan, eta jarduera kirurgiko gehiago iristearekin batera handituko dela aurreikusten da. Santa Marina ospitalean, Bizkaian, esaterako, okupazioa % 85etik gorakoa da.

Asistentzia-datu orokorrei dagokienez, egungo gripe-kanpainaren 20tik 26rako astean, Osakidetzak 583 kasu erregistratu ditu, aurreko asteko 533 kasuak gaindituta eta birusaren transmisioan gorakada argia berretsita. Txertaketaren lehen lau asteetan metatutako kasuen kopuruak (1.735) aurreko urteetako zifrak hirukoizten ditu (573 aldi berean), eta hilabete lehenago iritsi da beste kanpaina batzuetako ohiko mailetara.

Era berean, metatutako ospitalizazioak 192 izan dira, aurreko urtean 21 izan ziren bitartean, eta horrek eragin handiagoa izan du ospitaleetan. ZIUn ere igoera ikusten da: 8 pertsona ospitaleratu dira kanpainaren hasieratik, aurreko urteetan 1 eta 3 izan ziren bitartean. Itxura guztien arabera, beraz, kutsatzeen kurba aurreratu egiten ari da, baita asistentzian duen eragina ere, iaz erregistratutakoa baino lau bat aste lehenago. Klima eta txertaketa-erritmoa bezalako faktoreak erabakigarriak izango dira gripeak datozen egunetan izango duen bilakaeran.

Txertaketa Indartzeko Zentroa Bilbon

Gainera, datozen egunetan egoerari aurre egiteko, Osasun Sailak eta Osakidetzak Bilbon, La Casillan, hitzordurik gabeko txertaketa puntua indartzen jarraituko dute aste honetan Bizkaian (08:00etatik 20:00etara, astelehenetik igandera). Zentroak joan den ostiralean ireki zizkien ateak 14 urtetik gorako herritar guztiei, eta erantzuna masiboa izan da hiru egun hauetan. Guztira 4.799 pertsona immunizatu dira gripearen aurka.

359.000 hitzordu eman dira dagoeneko

Txertaketa-kanpainak erritmo onean jarraitzen du,  Osakidetzak, urriaren 6an kanpaina hasi zenetik, 359.143 hitzordu eskaini dituela guztira txertaketarako; horietatik 100.000 baino gehiago 80 urtetik gorako pertsonei dagozkie, eta 19.000 inguru 6 hilabete eta 5 urte bitarteko haurrei.