Gurutzetako Unibertsitate Ospitaleak saria jaso du “Zero emisioak” proiektuaren bidez erakutsitako klimarekiko

Sanidad #PorElClima sariek erakunde sanitarioek gidatutako ekintzak ikusarazi nahi dituzte. Izan ere, ekintza horiek klima-konpromisoagatik eta sektorearen deskarbonizazioari egiten dioten ekarpenagatik nabarmentzen dira, eta, aldi berean, pertsonen eta planetaren osasuna sustatzen dute.

Gas anestesikoak funtsezkoak dira praktika klinikoan; alabaina, atmosfera berotzeko ahalmen handia dute. 2020an, ospitaleko berotegi-efektuko gas guztien emisioen herena baino gehiago ziren. Horiek horrela, Gurutzetak, karbono-aztarna murrizte aldera, teknologia, kontzientziazioa eta jardunbide egoki klinikoak uztartzen dituen programa osoa jarri zuen martxan; hori guztia, bat etorriz Europako Itun Berdeak ezarritako helburuekin.

Proiektuak ospitaleko askotariko zerbitzuak inplikatu ditu: Aanestesiologia eta Bizkorketa, Ebakuntza-gelak, Ingeniaritza Biomedikoa, Mantentze-lanak, Erizaintza eta Kudeaketa Logistikoa. Hala, oso emaitza adierazgarriak lortu ditu:

• Inhalazio bidezko anestesiei lotutako CO₂ emisioak % 98 murriztu dira.
• Esku-hartzeak eragindako inpaktua murriztu da; izan ere, 2022. urtean 51 kg CO₂ isuri ziren eta 2024an, ostera, 5,4 kg.
• Anestesiako 42 ekipotan eta 35 ebakuntza-gelatan egin da esku-hartzea, eta barne hartu du oxido nitrosoaren erabilera kentzea eta ekipoak egokitzea iragazkiak jarriz, isuritako gasen % 99 harrapatu ditzaten.

Ingurumen-inpaktuaz gain, “Zero emisioak” proiektuak hobetzen du ingurune kirurgikoan dagoen airearen kalitatea, osasun-langileen osasuna babesten du, eta sendotzen du ospitaleak osasun jasangarriagoarekin duen konpromiso etikoa. Horren diseinua erraz errepikatu daiteke beste ospitale batzuetan, egiturazko aldaketa handirik beharrik gabe, eta betetzen du gas fluordunei buruzko Europako araudi berria.

Aitorpen horrek Ezkerraldea Enkarterri Gurutzetako ESI erreferente gisa kokatzen du berrikuntza klinikoari nahiz ingurumen-erantzukizunari dagokienez, eta erakutsi du posible dela aurrerapausoak egitea planetaren osasunarekin konpromiso handiagoa duen eta seguruagoa nahiz erresilienteagoa den osasuna lortzeko.