Pérez Iglesiasek etorkizunari aurre egiteko «gaitasun moldakorrak eta zeharkakoak» garatzearen alde egin du

Zientzia, Unibertsitate eta Berrikuntzako sailburuak lehendakariak inauguratutako «Euskadi etorkizunerantz» foroan hartu du parte.

Zientzia, Unibertsitate eta Berrikuntzako sailburu Juan Ignacio Pérez Iglesiasek «gaitasun moldakorrak eta zeharkakoak» garatzearen alde egin du, Euskadik berrikuntzaren arloan etorkizunean izango dituen erronkei aurre egiteko. Pérez Iglesiasek «Euskadi etorkizunerantz» foro ekonomikoan parte hartu du gaur, Europa Press Euskadik antolatuta eta Imanol Pradales lehendakariak Bilbon inauguratuta.

Perez Iglesiasekin batera, Noël d ‘Anjou Olaizola Ogasun eta Finantza sailburua eta Mikel Jauregi Letemendia Industria, Trantsizio Energetiko eta Jasangarritasun sailburuak hartu dute parte mahainguru banatan.

Zientzia, Unibertsitate eta Berrikuntza sailburuak «Ezagutza eta eraldaketa» izeneko mahai-inguruan parte hartu du, hainbat enpresatako ordezkariekin batera: Óscar Sanz (AWS), Mónica Barrera (DIGI), Mikel Díez (IBM), Roberto Beitia (Sarenet) eta María Iglesias (Viralgen).

Sailburuaren hitzetan, «etorkizunari buruzko iragarpenak egitea ez da inoiz lan erraza izan. Etorkizuna, berez, zalantzazkoa eta opakua da. Hala ere, argitasun falta horren aurrean, estrategiarik onena ez da zer etorriko den asmatzen saiatzea, baizik eta hainbat testuinguru eta sektoretan aplika daitezkeen gaitasun moldakorrak eta zeharkakoak garatzearen alde egitea».

Ildo horretan, azpimarratu du unibertsitateko goi-mailako prestakuntza eta goi-mailako prestakuntza-zikloak funtsezko zutabeak direla gaitasun eta trebetasun moldakorrak dituen talentua garatzeko. Eta horri gehitu dio zeharkako erabilerako teknologietan inbertitzearen garrantzia, hala nola, konputazio kuantikoan, adimen artifizialean (zentzu zabalenean) edo zibersegurtasuneko teknologietan.

«Bi esparru horietan oinarri sendoa izateak», nabarmendu du, «pertsonei eta erakundeei etorkizuneko erronkei aurre egiteko ondo prestatuta egotea ahalbidetuko die, edozein forma dutela ere. Gakoa zeharkako gaitasunen ikuspegi argia izatea da, eta gaitasun horien aldeko apustu zehatza egitea. Horrela, zalantzazko egoera batean ere, ondo hornituta egongo gara aukerak aprobetxatzeko eta sortzen diren erronkak gainditzeko «.

Bestalde, bere hitzaldian, gogorarazi du garrantzitsua dela zientzia- eta berrikuntza-politika iraunkorrak mantentzea denboran zehar, bai eta unibertsitateetan, CICetan, BERCetan eta zentro teknologikoetan ezagutzaren sorrera sustatzea, eta eragile horien eta enpresen arteko harremanak bultzatzea ere.