Hiru pertsona atxilotu dituzte Getxoko ostalaritza-establezimenduetan droga banatzeagatik

Pasa den asteazkenean, ertzainek 19 eta 31 urteko bi gizon eta 27 urteko emakume bat atxilotu zituzten Getxoko Algorta eta Erromo auzoetan, droga-trafikoaren delitua leporatuta. Pertsona horiek bi taberna erabiltzen zituzten substantzia sorgorgarriak banatzeko, eta horiek miatu ondoren, 1.800 gramo kokaina, 700 gramo haxix eta 8.200 euro inguru aurkitu zituzten. Beste hiru gizoni eginbideak ireki dizkiete ikertu gisa egitate berberengatik.

Getxoko Ertzain-etxeko drogen ataleko taldeak egindako ikerketen ondorioz, asteazken honetan bertan dispositibo bat ezarri zuten Getxoko Algorta auzoko bi ostalaritza-establezimendutan, droga-trafikoarekin lotuta egiten ari zitezkeen jarduerak argitzeko.

Operatiboan Ertzaintzako Txakur Unitateko kideek ere parte hartu zuten Getxoko Herritarren Segurtasuneko agenteekin batera, Getxoko Udaltzaingoko eta Erandioko Ertzain-etxeko agenteek lagunduta, haien jarduketei estaldura emanez.

Aipatutako bi taberna horiez gain, agenteek bi etxebizitza miatu zituzten Erromon eta Algortan eta trasteleku bat Leioan. Azken leku horretan, miaketan parte hartu zuten agenteek 1.700 gramo kokaina eta 700 gramo haxix konfiskatu zituzten. Eta ostalaritza-establezimenduetan beste 100 gramo kokaina aurkitu zituzten poltsetan banatuta, bai eta banako dosiak prestatzeko erabilitako bi doitasun-balantza ere.

Tabernetan aurkitutako ebidentziak oinarri hartuta, ziurtzat jotzen da jarduerarik ez zuen eta jendearentzat itxita zegoen lokaletako batean eguneroko txikizkako salmentarako substantziak biltegiratzen eta dosifikatzen zituztela, eta beste lokala, aldiz, substantzien salmenta eta banaketa estaltzeko erabiltzen zutela.

Egitate horien aurrean, lokalen arduraduna atxilotu zuten zerbitzari batekin eta beste inplikatu batekin batera, droga-trafikoaren delitua leporatuta, eta, ondoren, polizia-egoitzara eraman zituzten zegozkion polizia-eginbideei hasiera emateko. Lehenengo pertsona atxilotu zutenean, jendearentzat itxita zegoen lokaletik irten eta bigarren lokalera zihoan banako kokaina-dosiak zituzten hogei bat poltsatxo hartuta.  

Eginbideak amaitu ondoren, gaur goizean hiru atxilotuak, magrebtar jatorriko 19 eta 31 urteko bi gizon eta hego-amerikar jatorriko 27 urteko emakume bat, dagokion agintari judizialaren eskuetan jarri dituzte. Magrebtar jatorriko 22 urtetik 35 urtera bitarteko beste hiru gizoni eginbideak ireki dizkiete ikertu gisa egitate berberengatik.