Ivan Larraza: «Ongizatea giza garapen integraletik ulertzen dugu, ez soilik garapen ekonomikotik»

SER irrati-kateari eskainitako elkarrizketa batean, Ongizate sailburuordeak bere lan sasoi berria ilusiozko erronka gisa deskribatu du. «Ongizatea giza garapen integraletik ulertzen dugu, ez soilik garapen ekonomikotik» adierazi du Ivan Larrazak, eta gaineratu du garrantzitsua dela elkarbizitzaz eta bizitzeko moduaz hitz egitea.

Larrazaren hitzetan, Euskadiko ongizate-indizea oso handia da eta Eusko Jaurlaritzaren politika publikoak horretara bideratuta daude. Gizarte Zerbitzuen Legeari dagokionez, ia 20 urte dituela eta eguneratzea eskatzen duela aipatu du. «Joan den urtean gizarte-zerbitzuen zorroaren ebaluazioan ondorioztatu zen beharrezkoa zela eguneratzea. Aldaketa batez ari gara, eta ez lege berri batez, malgutasun handiagoa behar dugu eta berrikuntza sozialaren aldeko apustua egin» azaldu du Ongizate sailburuordeak. Ivan Larrazaren iritziz, finantziazioa da landu beharreko beste gaietako bat, baina batez ere iraunkortasuna bermatuz.

AI eta Altxor

Sektorean adimen artifiziala erabiltzeari buruz galdetuta, Larrazak ondorioztatu du AIk oinarrizko gizarte-zerbitzuen kudeaketa administratiboan lagun dezakeela eta, horrela, esku-hartzeari denbora gehiago eskaini diezaioketela. ALTXOR zerbitzuari dagokionez, iaz martxan jarri zenetik 1.500 pertsona baino gehiagorengana iritsi dela iragarri du Larrazak. «Arrakasta izaten ari da, bai Bilboko, Gasteizko eta Donostiako bulegoetan, bai online bidez», deskribatu du Larrazak. ALTXOR 60 urtetik gorakoentzako ekimena da, autonomia, garapen pertsonala eta gizartean parte-hartze aktiboa sustatzen dituena. Aurrez aurreko bulegoen eta espazio birtual baten bidez, orientazio pertsonalizatua eskaintzen du eta bizi-proiektu berriak sortzen laguntzen du.

Adinekoekin Lagunkoiak diren Hirien Munduko Biltzarra

Donostian egingo da aurtengo ekainean Adinekoekin Lagunkoiak diren Hiri eta Komunitateen III. Mundu Biltzarra. «Euskadi kalitatezko zahartzea lortzen duen herrialdea da, sare komunitarioa indartsua da eta pertsona horiek gizartean erabat integratuta egon daitezen laguntzen du. Nazioarteko biltzarrak ilusio handia eragiten digu eta Euskadi munduko mapan jartzen lagunduko du. Adituak etorriko dira zahartzeari buruz hitz egitera, eta Euskadin egindako jardunbide egokiak ere erakutsiko dira «, azaldu du Ongizate sailburuordeak.