26_0157 Atxilotuak, zerbitzuz kanpo zegoen ertzain batek etxebizitza batean lapurtzen harrapatu ondoren

Ertzaintzako agenteek 47, 26 eta 22 urteko hiru gizon atxilotu zituzten atzo arratsaldeko lehen orduan Muskizen, zerbitzuz kanpo zegoen ertzain batek etxebizitza batean lapurtzen harrapatu ondoren. Etxebizitza horretara sartzeko, finkako horma gainditu eta etxeko ate bat bortxatu zuten. Zonalde bereko bi etxebizitzatan egindako beste bi lapurretetan parte hartu ote duten ikertzen ari dira.

Atzo, ostirala, arratsaldeko hiru eta erdiak inguruan, zerbitzuz kanpo zegoen agente bat Muskizko etxebizitza batera hurbildu zen, barruan kolpe-hotsa sumatu ondoren. Une horretan jakinarazi zioten inguruko bizilagun batek hiru pertsona ikusi zituela lehentxeago kaputxarekin, kokatuta zegoen finkaren inguruko hormaren gainetik salto egiten.

Ertzain-etxeari egoeraren berri eman ondoren, ertzaina etxera sartu zen, eta hiru gizon aurkitu zituen. Ertzain gisa identifikatu zen, eta patruila bat iritsi arte atxikita edukitzea lortu zuen. Ertzainek ikusi ahal izan zutenez, etxebizitzara sartzeko ate bat bortxatuta zegoen, eta bertako hainbat gela armairu eta tiradera irekiekin nahasita zeuden.

Beharrezko egiaztapenak egin ondoren, hiru identifikatuak atxilotu zituzten, guztiak espainiarrak, indarra erabiliz lapurreta egitea egotzita. Jarraian, ertzain-etxera eraman zituzten atxilotuak, beharrezko izapideak egiteko, epailearen esku utzi aurretik.

Aurreko egunean, beste bi lapurreta egin zituzten eremu berean, hainbat etxebizitzatan, eta ikerketa abiatu zuten, orain atxilotutakoak delitu-ekintza horietan inplikatuta dauden jakiteko