Eusko Jaurlaritzak unibertsitateak eta BERC zentroak integratu ditu merkaturako transferentzia zientifikoa sustatzeko ekimenean eta 20 proiektu atzeman ditu

• Industriaren lehiakortasuna sustatzen duten enpresa-proiektu eskalagarrien bikaintasun zientifikoa eraldatzeko Industria Plana – Euskadi 2030 estrategia indartu du Basque Tek Venturesek bere laugarren edizioan
• Teknologia sakonetan (deep-tech) espezializatutako ‘venture builder’ publikoak Zientzia, Teknologia eta Berrikuntzaren Euskal Sareko 11 eragileren spin offeko 20 proiektu jaso ditu
• Aurreko edizioetan 16 enpresa sortu dira eta 10 inbertsio egin dira BTV funtsarekin

Eusko Jaurlaritzak oinarrizko eta bikaintasuneko ikerketako unibertsitateetara eta BERC (Basque Excellence Research Centres) zentroetara zabaldu du Industria, Trantsizio Energetiko eta Jasangarritasun Sailak sustatutako venture buildingaren deialdi berria, ezagutza zientifikoa sustatzeko oinarri teknologikoa duten enpresetan, “zientzia bikaina Euskadirentzako aukera-iturri estrategikoa” dela uste baitu.

Zientzia, Teknologia eta Berrikuntzaren Euskal Sareko beste eragile batzuetara zabalduta, Basque Tek Venturesek indartu egin du oinarri teknologikoa duten enpresa berriak sortzea sustatzeko eta Euskadiko industria-ehundura gero eta lehiakorragoari, berretzaileagoari eta industriako eta jasangarritasuneko erronkekin lerrokatutakoari ekarpena egiteko duen rola.

Aurtengo deialdian Zientzia, Teknologia eta Berrikuntzaren Euskal Sareko 11 eragileren 20 proposamen aurkeztu dira (Unibertsitateen 9 proposamen, BRTA aliantzaren zentroen 7 proposamen eta BERC zentroen 2 proposamen). Proiektuen sektoreari dagokionez, 9 osasunaren arlokoak dira, 8 industria adimendunaren arlokoak eta 3 energiaren arlokoak. Lurraldeari dagokionez, 11 proiektu Bizkaikoak dira eta 9 Gipuzkoakoak.

Hurrengo fasean, ekimenak proiektu bakoitzaren potentziala ebaluatu eta kontrastatuko du, proiekziorik handienekoak lehenetsiz, eta horiek venture builgingeko zerbitzuen ibilbide osoa izango dute eskuragarri, kanpoko eta BICen sareko adituen eskutik.

Martxan jarri zenetik, 13 zentrotako 40 proiektu aurkeztu dira Basque Tek Venturesen hiru edizioetan. Horietatik 24 proiektuk Venture Builder programarako sarbidea izan dute, eta, hala, 16 enpresa eratu eta 10 inbertsio egin ditu BTV funtsak. Datozen hilabeteetarako ere operazio berriak daude aurreikusita.

Basque Tek Ventures ezagutza zientifikoa eta teknologikoa merkatura transferitzea azkartzeko ekimena da, Euskadiko industrian eta ekonomian inpaktua izango duten oinarri teknologikoko enpresak sortuz. Ekimena teknologia sakonetan (deep-tech) espezializatutako venture builder publiko baten modukoa da eta laguntza eskaintzen du proiektuaren fase oso goiztiarretatik.

Basque Tek Venturesen eredua enpresen garapenean eta berrikuntzan inplikatutako eragile publiko nagusien jarduera koordinatuan oinarritzen da. Tartean daude SPRI, BRTA, Euskal Herriko Arrisku Kapitalaren Kudeaketa eta BIC sarea, eta horien unibertsitateek eta BERCek ere batzeko aukera izango dute, proiektuei laguntza koherentea eta espezializatua eskaintzeko helburuarekin.

Euskadik oinarri zientifiko bikaina du, baina ezagutzaren transferentzian aurrerapausoak egin behar dira ekoizpen-ehunduraren gainean inpaktua izango duen gaitasun hori eraldatzeko. Ekimena Industria Plana – Euskadi 2030en barruan sartzen da, eta “gure industria-ehundura indartzeko, berrikuntza eta jasangarritasuna sustatzeko eta gure industria lehiakorragoa izan dadin eta isurpen-aztarna gutxiago utz ditzan bermatzeko xedea” du.