Eusko Jaurlaritzak kamioien ikuskapena indartuko du maiatzean Euskadiko errepideetan

• Maiatzaren 4tik 10era bitartean merkantzia arriskutsuak garraiatzen dituzten kamioiak ikuskatuko dituzte
• Gainera, maiatzaren 19tik 21era bitartean, era guztietako kamioien pisua zainduko dute

Ertzaintzak kamioien zaintza eta kontrola indartuko ditu Euskadiko errepide-sarean, merkantziak kontrolatzeko eta zaintzeko bi kanpaina egingo baititu datozen asteotan.

Maiatzaren 4tik 10era bitartean merkantzia arriskutsuak errepidez garraiatzen dituzten kamioiak zainduko dituzte, jarduera hori arautzen duen nazioarteko akordioari (ADR) jarraituz. Besteak beste, ibilgailuaren dokumentazioa, plaken eta seinale laranjen erabilpena, sua itzaltzeko baliabideak, ekipamendu ezberdinak eta norbera babesteko ekipamenduak ere aztertuko dituzte. Egiaztatuko dute baimendutako gidatze-orduak gainditzen diren eta ezarritako atsedenaldiak egiten diren, takografoak funtzionatzen duen edo manipulatu egin den erregistroak faltsutzeko eta polizia-kontrolak saihesteko.

Bestalde, maiatzaren 19tik 21era bitartean merkantziak garraiatzen dituzten era guztietako kamioien pisua zainduko dute. Horrela, baimendutakoa baino zama handiagoa daramaten eta zama ongi lotuta dagoen egiaztatuko dute.

Istripu batean kamioiak tartean daudenean, ondorio larriak izan ditzake, are gehiago salgai arriskutsuak garraiatzen badituzte. Horregatik da garrantzitsua prebentzio-kontrol horiek egitea, Euskadiko errepide-sarean jokabide arriskutsuak saihesteko.

Kamioiak kontrolatzeko eta zaintzeko operatibo hauek, 2026. urterako Trafikoa eta Garraioa Zaintzeko eta Kontrolatzeko Kanpainen egutegiaren baitan programatu diren 33 kanpainen parte dira.