Eusko Jaurlaritzak proiektuaren benetako beharretara egokitu ditu Uretamendi berroneratzerako dirulaguntzak

Gobernu Kontseiluak gaur onartu du 2022ko abenduaren 27an Bilboko Udalari Uretamendi auzoaren hiri-berroneratze integralerako zuzeneko dirulaguntza emateko hartutako erabakia aldatzea. Egokitzapenak udalak berak egindako eskaerari erantzuten dio, laguntzak gauzatzeko eta justifikatzeko epeak berriro programatzea eskatu baitu.

Birprogramazio horrek ez dakar dirulaguntzaren zenbateko osoa handitzea —455.507,60 euro— eta jarduerak justifikatzeko epea 2026ko abenduaren 31ra arte luzatzea aurreikusten du. Era berean, aurreikusitako urtekoak birbanatu dira, hasieran 2025erako esleitutako funtsak doituta (227.753,80 euro) eta horietako batzuk 2026ra eramanda.

Auzoak Biziberritzeko eta Hiri Agendako zuzendari Ana Telleriak azaldu duenez, “aldaketa hau Udalekiko etengabeko lankidetzaren emaitza da, proiektuen garapenean aurkitzen dituzten zailtasun praktikoen berri ematen baitigute”. Telleriaren hitzetan, “uste dugu jabeen erkidegoetako erabaki-prozesuak, obren kontratazioa eta proiektuen gauzatzea hasieran aurreikusitakoa baino gehiago moteldu direla, eta, beraz, beharrezkotzat jo dugu epeak malgutzea, jarduerak arriskuan ez jartzeko”.

Bilboko Udalak, zehazki, jardueren esparruan sartu diren bi laguntza-ildo berri kudeatu ahal izateko epeak luzatzeko beharra argudiatu du: bata, bizitegi-eraikinetan birgaitze energetikoa eta irisgarritasuna sustatzeko, eta, bestea, degradatutako espazio pribatuak birnaturalizatzeko. Bi deialdiak 2026ra arte kudeatuko dira.

“Hiri-berroneratze integralak denbora, hurbiltasuna eta egokitzeko gaitasuna eskatzen ditu”, nabarmendu du zuzendariak. “Eusko Jaurlaritzan, biziberritze fisikoa ez ezik, soziala eta komunitarioa ere egiten dugu, eta, horregatik, udalei eta bizilagunei laguntzen diegu prozesu osoan, haien benetako beharretara egokituta”.

Birprogramazioaren eskaera eragin duten faktoreen artean, komunitateen barne-dinamiketara egokitzeaz gain, obrak egitean sortutako zailtasunak ere daude: Ukrainako gerraren ondoriozko materialen garestitzea eta eskasia, eta jabeen erkidegoen eta enpresa esleipendunen artean sortutako gatazkak, kasu batzuetan, kontratu eta prozedura judizialak deuseztatzea ekarri dutenak.

“Badakigu horrelako prozesuak ez direla errazak”, azpimarratu du Telleriak, “baina, hain zuzen ere, horregatik bultzatzen ditugu hurbileko bulego teknikoak, tartean Uretamendikoa, auzoan bertan baitaude, zalantzak argitzen, eragileen arteko bitartekotza egiten eta proiektuak berme guztiekin aurrera aterako direla ziurtatzen”.

Aldaketa horrekin, Uretamendin aurreikusitako jardueren jarraipena bermatzen da, eta Etxebizitza eta Hiri Agenda Sailak euskal auzoak espazio jasangarriago, inklusiboago eta erresilienteago bihurtzeko duen konpromisoa indartzen da.