Mikel Jauregi Industriako sailburuak ongietorria eman dio Iván Jiménez Bilboko Portuko presidente berriari

Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburua Bilboko Portuko instalazioetan bildu da Iván Jiménez Bilboko Portuko Agintaritzako (BPA) presidente berriarekin eta Ricardo Barkalarekin, kargua utzi berri duen presidentearekin.

Mikel Jauregi sailburuak lehenengo bilera egin du Bilboko Portuko Agintaritzaren egoitzan, Iván Jiménez presidente berriarekin eta Ricardo Barkala kargua uzten duen presidentearekin. Azken hori 2018ko uztailetik izan da presidente, eta atzo utzi zuen kargua. Sailburuak berariaz eskertu nahi izan dio Barkalari azken zazpi urteotan egindako lana.

Iván Jiménez Airak Bilboko Portuko Agintaritzako presidente kargua hartu du gaur, uztailak 17, Eusko Jaurlaritzako Gobernu Kontseiluak ekainaren 24an onartutako izendapena EHAAn eta BOEn argitaratu ondoren.

Presidente berria nazioarteko ikuspegia duen profesionala da, eta Bilboko Portua logistikan eta merkataritza globalean nodo estrategiko gisa proiektatzeko gaitasuna du. 20 urte baino gehiagoko esperientzia du datuetan, berrikuntzan eta nazioarteko aliantzetan oinarritutako estrategiak garatzen, eta etapa berri honi ekingo dio BPAren buru gisa, Euskadiko ekonomiarako funtsezkoa den Portuaren etorkizuneko erronkei aurre egiteko. Nazioarteko merkataritzan nodo estrategikoa da Portua, eta funtsezko azpiegitura euskal industriaren lehiakortasunean.

Esperientzia handia du negoziazioan eta harreman instituzionaletan, eta, horrez gain, big datari dagokionez ikuspegi estrategikoa du. Hori dela eta, lider ezin hobea da Bilboko Portua modernizatzeko eta agertoki globalean proiektatzeko. Horretarako, berrikuntza eta digitalizazioa garatzeko ahalmena du, eta arreta berezia jartzen du datuen kudeaketa estrategikoan, helburu izanda eraginkortasun operatiboa, jasangarritasuna eta erabaki adimendunak hartzea.

Presidente berriaren ibilbidea

Iván Jiménez Aira (Barakaldo, 1975) Zuzenbidean lizentziaduna da, Zuzenbide Juridiko eta Ekonomikoko espezialitatean, Deustuko Unibertsitatean; Deusto Business School-eko Enpresen Administrazioko masterra du, eta ESADEko Business Analytics masterra. Massachusetts Institute of Technology (MIT) erakundearen Prestakuntza Digitaleko programa bat du, eta bost hizkuntza menderatzen ditu (euskara, gaztelania, ingelesa, frantsesa eta italiera).

2011tik 2025era bitartean, Bizkaia Talent-eko zuzendaria izan da. Irabazi-asmorik gabeko erakunde hori goi-mailako prestakuntza duten langileak Euskadira erakartzeko eta lotzeko eratu zen, eta, hainbat erakunderen artean, Bizkaiko Foru Aldundiak sustatu du. Bizkaia Talent-en datuetan, berrikuntzan eta nazioarteko aliantzetan oinarritutako estrategiak garatu ditu.

Halaber, nazioarteko mugikortasunarekin eta lurralde-lehiakortasunarekin lotutako Europako Batzordearen hainbat proiektutan aholkulari izan da; eta nazioarteko talentuaren kudeaketarekin eta datuen digitalizazioarekin eta analitikarekin lotutako nazioarteko ekimenetan hizlari.

Lehenago, Mapfreko iparraldeko enpresa handi eta ertainen arduraduna izan zen, eta ‘Soineko’ dendaren sortzaileetako bat, hau da, Euskadin online salmenta hasi zuen lehenengo ehun-dendaren sortzaileetako bat.