Euskadik eta Flandriak Europako industria eta subiranotasun teknologikoa bultzatzeko aliantza estrategikoa sendotu dute

• Imanol Pradales lehendakariak Flandriako ministro-lehendakari Matthias Diependaele hartu du Ajuria Enean, eta lankidetza ekonomiko, industrial eta teknologikorako bide berriak aztertu dituzte.
• Topaketa Euskadi Europako industria-eztabaidaren erdigunean kokatuko duen ‘Leaders Meeting – Fit for the Future’ goi-bileraren esparruan egin da.
• Imanol Pradales: “Aurrerapauso bat egingo dugu lankidetzan gehiago eta hobeto jarduteko, helburu garbi batekin: gure gaitasunak Europako lehiakortasunaren, berrikuntzaren eta subiranotasun teknologikoaren zerbitzura jartzea”.

Imanol Pradales lehendakariak Flandriako ministro-presidente Matthias Diependaele hartu du gaur arratsaldean Ajuria Enea Jauregian, ‘Leaders Meeting – Fit for the Future’ izeneko nazioarteko ekitaldiaren barruan. Ekitaldi horrek Europar Batasunaren etorkizuneko industria-erronka handiei buruzko gogoeta egiteko eta erronka horietan aurrera egiteko eztabaidaren erdigunean kokatuko du Euskadi.

Bileran, bi ordezkaritzek funtsezko hainbat gai aztertu dituzte, hala nola estaturik gabeko eskualde eta nazioen arteko diplomazia indartzea, lankidetza ekonomikoa, industriala eta teknologikoa, eta Euskadik eta Flandriak Europako gobernantzan betetzen duten zeregina. Testuinguru horretan, agerian jarri dira bi lurraldeek 2015. urteaz geroztik duten aldebiko harremana eta estrategikotzat hartzen den aliantzan sakontzen jarraitzeko borondate partekatua.

Bileraren ondoren, lehendakariak azpimarratu du ibilbide-orri komun bat zehaztu behar dela industria-ereduaren eraldaketa, deskarbonizazioa, digitalizazioa eta sektore emergenteen (hala nola bioteknologiaren) bultzada direla eta Europarentzat erabakigarria den une honetan. Ildo horretan, Europako eskualde eta nazio industrialek kontinentearen lehiakortasuna, berrikuntza eta subiranotasun teknologikoa indartzeko betetzen duten zeregin aktiboa defendatu du.

Lehendakariak, gainera, Euskadik Europa indartzeko egin nahi duen ekarpena nabarmendu du. Horretarako, Euskadiko industriarako estrategikoak diren hiru esparru nagusi izango dira egin beharreko ahaleginen ardatzak: teknologia garbiak, adimen artifiziala eta teknologia kuantikoak, eta osasuna eta bioteknologia. Arlo horietan, Europako proiektu autonomoago eta erresilienteago baten zerbitzura jarri nahi ditu Euskadik bere gaitasun industrialak, zientifikoak eta teknologikoak.

‘Leaders Meeting – Fit for the Future’

Ajuria Eneko harrera Bilbon gaur eta bihar egingo den eta Euskadi Europako industria-eztabaidaren erdigunean kokatuko duen ‘Leaders Meeting – Fit for the Future’ goi-bileraren esparruan egin da. Goi-bilera lehendakariak eta Flandriako ministro-presidenteak zuzenduko dute, eta erakundeetako, enpresetako eta teknologien arloko ordezkariak bilduko ditu, berrikuntzaren, zientziaren, industriaren eta teknologia estrategikoen arloko ikuspegi partekatu bat egituratzeko.

Topaketan, ekimenaren parte diren lurraldeetan eta teknologia garbien, adimen artifizial eta kuantikoaren, eta osasunaren eta bioteknologiaren esparruetan diharduten 40 kluster inguruk parte hartuko dute. Foro horren bidez, Euskadik harremanak estutu, aliantza berriak aztertu eta bere produkzio- eta teknologia-ehunean zuzeneko inpaktua izango duten aukerak sortu nahi ditu, eta, aldi berean, eskualdeek Europako politiken diseinuan eta hedapenean funtsezko eragile gisa betetzen duten zeregina aldarrikatuko du.